عيال الحارة بين الماضي و الحاضر....

حاره بسيطه جميع سكانها قلوبهم على بعض الكل عارف الثاني اطفالهم يلعبون مع بعض مافي أي تكلف بينهم البساطه و الحب عنوان هالحاره مرت السنين على هالحاره و تغير كل شي فيها و صار التكلف و القطاعه هو عنوانها

قبل عشرين سنه ...

صالح..يمه ابي اروح العب مع عيال الحاره

ام صالح..روح ياوليدي العب و اخذ معك اخوانك الصغار يلعبون

صالح..ان شاءالله و تراني بتأخر

ام صالح..ماعليه اهم شي انتبه لخوانك لا يطيحون ولا يصير فيهم شي و اترك باب الشارع مفتوح يمكن يبي احد يزورنا

في الوقت الحالي ..

محمد..يمه ابي اروح العب مع عيال الحاره

ام محمد..لا لاتروح تلعب معهم تبي يجي احد يخطفك الحين اجلس بالبيت و العب مع اخوانك الصغار

محمد..يوووه يومه ماعرف العب معهم انا كبرت و ابي العب كوره

ام محمد..قلت لك خلاص مافيه اجلس بالبيت ولا تتحرك و قول للشغاله تقفل الباب يالله لاحد يجي يزعجنا

في القريه البسيطه ...

ام صالح..هااه يا ام خالد وشلون عيالك سويتي لهم الطبخه الي قلتها لك

ام خالد..ايه ابشرك يا ام صالح سويتها الله يجزاك الجنه و ابو خالد مدحها

ام صالح..ايه ماعليك عندي طبخه ثانيه تنفع لك لا تشيلين هم وانا بجي اساعدك لا تتعبين و انتي حامل

ام خالد..ماتقصرين يا ام صالح و نعم الجيره

في المدينه ..

ام سلطان..ماشاءالله يا ام محمد من وين جايبين هالفطاير انتي مسويتها

ام محمد..هو لا الشغاله هي الي سوتها تعرفيني ما اسوي شي من يوم كنت في بيت اهلي هماك اختي

ام سلطان..ايه قلت يمكن وحده من جاراتك معطيتك الطريقه و تعلمتيها

ام محمد..لا حبيبتي اصلا ماعرف جيرانا حدي انتي و امي و صديقاتي بس وما اعترف بالجيران وشوله الازعاج

ــــــــــــــــــــــــــــــــــــــــــــــــــ ــــــــــــــــــ

مرت في حياتنا مرحلة طفوله و مرينا بتجارب و انتقلنا من مرحله للثانيه و من منطقه للثانيه تغيرت فيها الحياه و تغيرت فيها الناس ذكرياتنا نحملها و مستحيل ننساها كل سنه تمر علينا نحمل منها ذكريات اكثر من قبل ماننسى العب مع عيال الحاره كنا بنات و عيال مع بعض محد يفرق بينا و يقول لا لاتلعبين مع هالولد ولا لاتلعبين مع ولد فلانه لاني اكره امه او بينا عداوه كنا نجتمع مع بعض في الشارع و نتسابق قدام العالم و نلعب كوره ماكانو اخواني يقولون لي انتي بنت لا تلعبين كوره لا بالعكس كانو ينادوني العب معهم و اكمل الفريق بس القهر كانو يحطوني حارس مايدرون اني عميا ما اشوف الي قدامي و كالعاده ينهزم فريقي الين اكتشفو ان العيب في عيوني و قررو يحطوني احتياط

ما انسى جيرانا كان كل صبح القهوه عند وحده منهم و العصر القهوه عند الثانيه محد يقول عيب تطلعون من بيتكم والا لاتزورون احد كان بابنا مفتوح للجميع ماعمري شفت ابوي مقفل بااب مجالس الضيوف 24 ساعه مفتوح بعكس الحين استغرب اذا لقيت الناس مقفله بابها ولازم تتصل عليهم و تقولهم بزوركم والله كانت امي متى مابغت تزور ناس تلبس عبايتها و تروح لهم ماشفتها تتصل مثل الحين و تاخذ موعد

كنا من الناس الي توصل الرحم و ماتقطعه لازم كل عطله و خميس و جمعه و ايام الاعياد عند جدتي و خوالي و عماني مستحيل تمر هالايام مانشوفهم و ننبسط عندهم بس الحين كل شي تغير ممنوع تزور احد او تروح له يقولون لك اتصل عليهم و بارك لهم بالعيد و تطمن عليهم و يكفي مدري ليه كل سنه تنقطع صلة الرحم فيها اكثر من السنه الي قبله تتوقعون يجي يوم و اتزوج و يمنعني زوجي عن اهلي يقول كلميهم بالتلفون و يكفي

كانت الام شي كبير محد يرفع صوته عليها او يقولها شي نحترمها و نقدرها امي الله يطول بعمرها ماعمري شفتها ترفع صوتها على جدتي الله يرحمها بالعكس كانت تحترمها و لو تطلب عيونها تقولها ابشري و لو تمرض جدتي مستحيل تجلس لدرجة انها كانت تتركنا بالبيت لوحدنا و تسافر تشوف جدتي كنت اتوقع ان هالشي تسويه مع جدتي بس اكتشفت انها تسوي هالشي مع جدتي ام ابوي كانت تخدمها بعيونها كأنها امها بعكس الحين الولد يغضب امه و البنت تنسى امها بمجرد ماتتزوج يمكن فيه قصيده قريتها قبل فتره خلتني ابكي و احس ان ايام قبل وبر العيال بوالدينهم راح و كانت القصييده هي..

وين انت يا حمدان امـك تناديـك .. وراك مـا تسمـع شكايـا وندايـا

يا مسندي قلبي على الدوم يطريـك .. ما غبت عن عيني وطيفك سمايـا

هذي ثلاث سنين والعيـن تبكيـك .. ما شفت زولك زايـر يـا ضنايـا

تذكر حياتي يـوم اشيلـك واداريك . والاعبـك دايـم وتمشـي ورايـا

ترقد على صوتي وحضني يدفيـك .. ما غيرك احدٍ ساكن فـي حشايـا

واليا مرضت اسهر بقربك واداريك .. ما ذوق طعم النوم صبـح ومسايـا

ياما عطيتك من حنانـي وبعطيـك .. تكبـر وتكبـر بالأمـل يـا منايـا

لكن خساره بعتني اليـوم وشفيـك .. واخلصت للزوجه وانا لي شقايـا

انا ادري انها قاسيـه مـا تخليـك .. قالت عجـوزك مـا ابيهـا معايـا

خليتني وسط المصحه وانا ارجيك .. هذا جزا المعروف وهـذا جزايـا

يـا ليتنـي خدامـة بيـن اياديـك .. من شان اشوفك كل يوم برضايـا

مشكور يا ولدي وتشكر مساعيـك .. وادعـي لـك الله دايـم بالهدايا

حمدان يا حمـدان امـك توصيـك .. اخاف من تلحق تشـوف الوصايـا

اوصيت دكتور المصحه بيعطيـك .. رسالتـي واحروفهـا مـن بكايـا

وان مت لا تبخل علـي بدعاويـك .. واطلب لي الغفران وهـذا رجايـا

وامطر تراب القبر بدموع عينيـك .. ما عـاد ينفعـك النـدم والنعايـا

تتوقعون بعد هالقصيده الى الان فيه بر والدين مثل قبل او كل شي تغير و تغيرت الحياه مع اني اتوقع ان جيل هالوقت تتوقع منهم كل شي و اكبر دليل الواحد كبر اصبعي و لسانه اطول منه

قبل مافي غيبه ولا نميمه الكل صريح مع بعض و كلهم يحبون بعض ومابينهم أي خلاف يتصافون بسرعه مو مثل الحين لو يقوله ابعد شوي على طول زعل و سبب هوشه و يجلس شهر مايكلمه حتى لو اخوه ما انسى امي و زوجات ابوي كانو يجلسون مع بعض يتقهون و يضحكون و كل وحده قلبها على الثانيه مافي بينهم خلاف تتوقعون لان ابوي عادل بينهم او بسبب الناس الي ربوهم على الحب مو الكره اذكر خواتي اول مانقلنا الرياض و درسو كانو مع بعض كل الوقت و مايفترقون يوم سألوهم البنات قالو لهم حنا خوات من الابو و كل وحده امها غير استغربو مو متخيلين ان فيه خوات من الابو الى الان يحبون بعض

كل شي تغير في حياتنا حتى طريقة الاكل و اللبس و الكلام يوووه اتذكر اول ماتعلمت كلمة يس و نو كنت كاشخه على اخواني و خواتي الصغار و انبسط اذا نادتني امي و اقولها يس و اذا سألتني عن شي اقولها نو حتى لو كنت اعرف الي هي طالبته اهم شي اقول نو و ابين لهم انه عندي لغات

احيانا اقول ان سبب تغير حياتنا هو موت كبار السن لانهم هم الي كانو متمسكين بالعادات و التقاليد و تربو على البساطه مو الدلع و الفشخره ما انكر ان جدتي الله يرحمها هي الي كانت جامعتنا مع بعض و توصل الرحم و من بعد موتها كل واحد راح في طريقه و مايسألون عن بعض الا في الاعياد يتصلون يعايدون و يقفلون و الوعد السنه الي بعدها اذا جا العيد احيانا فيه ناس تموت ماندري الا بعد موتهم بشهر الى هالدرجه وصلنا

بعد يوم بندخل سنه جديده و نودع عام 1428هـ و نودع معه ذكريات ثانيه ممكن تكون حلوه و ممكن تكون سيئه بالنسبه لي صارت السنين مثل بعض فقدت طعمها من بعد ماراحت الطفوله و البساطه منها و يمكن اتفائل في هالسنه ان تتغير نفوس العالم و يحاولون يرجعون لعيشتنا زمااان

حاولت مع بداية هالسنه الجديده اننا نرجع لذكرياتنا و ننسى الكره الي بينا و نبدا من جديد و نبدا حياه ثانيه محد يدري عن المكتوب يمكن بكره مانكون مع بعض و ممكن نكون مع بعض بس كل شخص شايل على الثاني شي في قلبه و نتصافى و نربي عيالنا على بساطتنا و طيبتنا و حبنا لبعض